La renniri dai l’incoura
Ai lai canaillai dou viau tein

Sti conta lai bien vielli chouir plou vielli quai hli dai Farinet. Parait quai lai arriva vèré per ouna coumouna dou distric dai Chirro. La joun dionn einn Annivier lai jâtro chouc pai la Contrâ oubinn à Zali ma diusto oun châ pas.

Fâ crirre quai ein hlic teint laie mé dai vârenn quai ora. Li monto che fadiève pouiri di morts, chouticvè pâmé dai mijon lo nét.

Ounâ beinda dai mâfajenn l’aie formâ ounâ espèssi dai confrarie avoué comité ai to lo sanfrusquin. To lai jann fadièvonn ounà gran ribotta ai prèparavonn ein mèmo tein lai plann po lai jâtro zor.

Dau di plou artic dai la clica irann dèsigna po férai les jamplète. Li fèhâ che pachâve divers la nét dai chaint Antoaino.

Oun yazo lafférai la pa roussic… Lire jouc daissidâ ai protocolâ dai mindiè dai zér dai monton, mâfloou faimella igal todri gras. Po daichert faailliève ahirai dai nui. Lai jâtre provijion li grand comità cheinzardièvai.

Lai dau compéri apré ahirai titia lai plann chai metton à la rèzèrca d’oun berrâ ai d’oun char dai nui. Li mé lesto chai chomettouc dai rahic ounâ zavachi po reintra ou galatâ preindrai lai nui, l’âtri mé solido yinn per oun bau robâ lo berrà.

Daiyièvonn chai trovâ ou plou victo à la tribonnâ don chimihièro lé avoué daipojavon lai téhai di bon daifonn.

Li canailli di nui la jouc bon férai. L’aie nioun à mijon la pouchouc preindrai chin tann dai mâ teint lo chac ai arriva dai bonaura a la plachi fixâhi. Po pa tra paidre dai teint chai mèt a crouchic lai nui ein atteinjenno lo compéri qui dèyièvai ennic avoué lo cozouc. Mâ a stic li ai pa ala igal. Yinn ou bau avoué aldave preindrai la béhi l’aie dai mondo qui vaillièvonn ounâ vatzi villinta la renn pouchouc azic. Faillièvai atteindrai, ai hlic dou chimihièro chimpachieintâvai tot ein croquein lai nui. Chenn la doura oun quarro dai la nét. Lo gran matin li marioli pâche to pré po alla chonna l’In-Maria avoué dai bruic va vèrai quoai la ! Ma li volaur li crie : “Dai la part dai loucssifer fa-ti tai picca vic on mort ?”

Li pauro marioli la pa daimanda lai réstai che chauve ou galop raiveillai l’incoura. “Vô Mouchiou ennie victo tanquiè ou chimihièro, io ché chouir qui li diablo daivaurai lai téhai di bong daifonn ain la tribonnâ. Ila minachia dai harbota mè.
- Pouic pa allà li raifonn li bravo priro, io è lo romatriss coun appélai la renniri, pouic
a painna mai raimoua.
- Châdo Mouchiou fâ ennic, io vo paurto.

A fauchi dai chouplaiè, li brâvo incoura la concheintic. Che armai d’oun flacon d’évoui benicti dai proumièri chaurta ai d’oun chaquett dai fort bènic di capouchin ai chai mèt ein zarzi cau dau morioli.

Parait qui lirai pajeann ma hla pouiri la quan mèmo pouchauc zaréyè. Li canailli di nui vit arriva oun avoué ouna zarzi la crouc qui vignièvai li compéri avoè lau zouco criai : « L’ai ti gras ?”

Li pauro marioli plou épouvanta quai diamé, zittai bâ cha zarzi.

Li conta dit pa mè loin, nioun pou dirai chi lai doulaur dai la renniri lann disparouc.